قصيده رائعه جدا لصباح الهلالي

من طرف header_79 4/4/2008, 1:01 am

بعد ماي الفرات الضيفنة انبدي والكطان الازرك مانكر شصة
وكل اسباب جوعي بدون استثناء كله اتروح فدوة الورقة الحصة
كبل خطار اجاني وصادفت عوز على اخدودي شمع ذابت الكصة
ولئن تنوري طين وغيرتة من الكاع خلص عدنة العجين استنسخ الكرصة
هسه اشبينة ليش وشختلف بالناس اذا يلتفت ضيفك ينوكل نصة
اهلنة البيت واحد شو صفو ضدين ملة اتلوم ملة وبالكلب غصة
اركض طاح اخوك بظهرة حط سجين لا غيرك ايذبحة اتفوتك الفرصة
سكرانة العدالة وناس تاكل ناس زمن صارن خوات العلوة والنصة
طم هور الجبايش والفكر بستان وبكلب الرمادي خنجرك رصة
ولك مو عيب واحنة الي نشيل الراس اشلون اجفوفنة اتكض راسنة اكصة
اختلفنة احنة بعلي وبعمر وبعثمان لو يدري محمد بينة ما وصة
المحتل اطلعة حط اديك وياي يا محتل طلع بالهوسة والخبصة
كطرة حية انة وتكصة
يعرفني النشد عنة والتكصة
ولك احنة بجسم واحد والتكصة
جفك لا تنضن كصيت ادية
فدوة ارجوك تهدة وتلعن الشيطان عسة من غيراك بحظة وبختة
اني اشردت منك غير ننسة الراح وضرفك عن الزعل بيناتنة اتغضة
انفطمنة احنة على البنادق وانتة تعرف زين الشعيرة بلا نفع لو زعلت الفرضة
اني وياك سيف ونذبح الجلاد واذا تعجز ادينة بلوزتة انعضة
العباس جدنة الماحتاج اجفوف ضل الحد السنون لازم القبضة
جا شنهي عليمن ليش مختلفين اني شنو القبلتة وانتة الاترفضة
ايجوز الما اكضة الخلل بالجفين اليعبر علية اجفوفك اتكضة
انة غركان يمك يا اخو عثمان البجسر الائمة ما صفن لحضة
شاف الايد وحدة وناصبته الماي وعلى كد الجفوف الصاحتة ابشضة
انة دجلة الخير المانست عطشان واخوي انتة الفرات وترضة ما ترضة
اختلفنة باولياء الله وضعنة
واحنة الساس للدنيا وضعنة
وربك ما نغير من وضعنة
شرط الة تحط ايدك بدية

قصيده اخو عثمان للمبدع صباح الهلالي