ظل وياي اريدك والبقن جم يوم

كلي شراح أكلك وأنت راح تروح
وليش تلح عليه وتنتظر ردي
هذا لسان حالي دموعي تحجي وياك
وراح أسكت واحَجيّ أدموع ال بخدي
وأسولف بالدمع وتوسلك عبرات
أود اشبع بشوفك وأحتفل ودي
ظل وياي أريدك والبقن جم يوم
وهل جم يوم صارن حدك وحدي
خليني أرد اشوفك كمت احسك طيف
وياعين التكض الطيف اليعدي
صرفنه اسنين حبنه وخلصن تبذير
وعلى يوم النشوفك باجر نجدي
أخذني وياك أريدك ما اريد الغير
وكون أبسدك اكعد وتكعد بسدي
لتخليني وحدي منين أعرف الناس
ولا اكدر اعاشر لاخلك عندي
أحب أشلون غيرك من اود اشلون
وأنه وياك كلش خلصت ودي
ابكد حبك لنفسك جنت أناني وياي
ومنو بكدي يحبك محد بكدي
يل بيه ويّ روحي طلعت موت
شيردكم عليّ لو صيحت ردي
اخذني وياك مني شعندي باقي وياي
وكلي وياك أخذني وكلشي لتودي
شيصيرن بعد خل اليصير أيصير
خل كلشي الأليه وينكلب ضدي
خل اسنيني تغرك خله عمري ايفيض
خل أكبال عيني وينهدم سدي
أخاف أعليك صح جنت كلش حيل
وألمن بعدك أنت وخايف شعندي

ـــــــــــــــــــــــــــــــــــــــــــــــــــــــــــــــــــــــــــــــــــــــــــــ
بلادي وان جارت علي عزيزة واهلي وان قسوا علي كرام
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الوطن واحد مالة اي بديل وهو العراق وشعبه الاصيل