دوووووي لعباس جيجان موضوع جديد !

من طرف Marwan22_Iraqilove 2/4/2008, 3:38 am

كالت

( دوي ) ...
واستوى الما يستوي
ومن تخزرك عين جنها
تكول خنجر ملتوي
والطول طول الخيزرانه
وشو جنها حية
ولو مشت تطوي طوي
وانا اعد روحي قوي
من شفتها تخربطت وتبريدت
صرت انا والماكو سوي
كلمتها عود مثل الناس
( اشتبليف ميشل ميشوي )
سكتت وما جاوبتني
دك عليها التلفون الخلوي
اشرت جاوب جلبها
وانا ما شايف جلب نبحه عوي
فرغت وردت علي
( فلي كلانت كوميي اوتسبراك )
حجيك عربوي
( كزخ اوت اراك )
انا جاي من العراق
( اليف اونن نيت سامن )
لا الي صاحب ولا عندي خويي
( فتيمر) ردت عليه
وجنها كالت وي علي
وحيدك تعيش ببلدنا وتنزوي
واحنا حتى جلابنا تعيش برفاه
وويا البشر عاشو سوا وسكنو سوي
شمالكم صرتو طشاش ..
واحنا ندري ذراعكم ما ينلوي
جاوبتها والخجل ندى الجبين
والدمع مو ماي ينزل دموي
انا من بلاد الرافدين العاث بينا الحربوي
وانا من شعب العراق الداخ من كثر الدوي
وانا من شعب التحاصر والتعوق
والتأثر بالاشعاع النووي
لا تهيجين الجروح ..
عاد يا بنية ارعوي ..
ولا تذكرين بهلي وطيبة هواهم
وج ترى الفركة جوت كلبي جوي
انا عطشان على دجلة
شما شربت من مايكم ما ارتوي
دوي ....
دوي ...

تحياتي مروان عراقي