قصيدة الحب الاول(ابو ذيه)زنجيل

من طرف **doskee_93** 12/8/2007, 1:56 am

الحب الاول لانك بالتزامك مو منهلك
اخاف تشيل ذنبي مو منهلك
منو بكدي يحبك مو منهلك
منو بكدي يحبك من عشرتك
وتمنى يصير اصبع من عشرتك
وانا شكد ظليت خايف من عشرتك
اعد بسنين عشرتنا وهي جروح
واحس ويه النفس يطلع وهج روح
واخيرا" كتلي ودعني وهج روح
اروحا" وين ماكدر هوى انته
وانا الما هان من اجلك هونته
الي بدنياي شي واحد هو انته
وحرت بين ان تركته وان تبعته
انا الونيت والون ون تبعته
ماباعك حبيبك وانته بعته
حبيبك باع عمره واشترك بي
وحزن كلبه على حزنك واشترك بي
وبعد شدوس كلبي واشترك بي
جبل حبه وتكلكل لن تكل بي
ويدنيا شما دفعتي لن تكلبي
واذا تنسى يكلبي لنت كلبي
ولا اريدك بعد وبصدر احملك
وحبيبي شلون ترضى بصدر احملك
اذا حملك يتعبك صدر احملك
الي ووروحي الارض وشكد دولهه
وتداوي الداء لو بالمخ دولها
بس العين مايحصل دوه الها
دواها العين خلها من تقر بي
وتصب كلما تشوفك منت قربي
ولك شيصير حبك من تقر بي
وتحبني انته يقين بصدري مو شك
الف شوكه السكوت بصدري مو شك
انذبح كلبي وتشضى بصدر موشك
وعرف محد يدفنه شي دفن شي
عكب صدر المواكد شي دفن شي
كفر من رسم غيرك شيدافنشي
واضن للجنه يدخل من يرسمك
وحبيبك يمسح اسمه من يرى اسمك
بسمك حبي جمالك من يرسمك
وانا الليل بعيونك شفته كحله
وشفت شمس الاصيل وشفت احلى
العسل من ضكته كلك شفتك احلى
اذن لو من شفاهك بستك اشفا
اذن انته المات يعدل بس تكشفه
شتضن حبك يضعفك بس تكشفه
وعلي تخفي اهتمامك واكتراثك
وانا من مات كلبي وكتراثك
نسيت لحب الاول وك تراثك
صدك ينسى تراثه هسه جيلك
وتشوف زواج عيني هسه اجيلك
وانادي وماتكلي هسه اجيلك
صحت لك يا وصارت كبري يائي
واذا رائيت بالشط كبريائي
حبيبي شلون تجرح كبريائي
وتذلني كبال كل ناسك وناسي
وبقيت بصحره شاتلني وناسي
ناس تكول ال تسكت وناسي
لان كلش مذلتي لاكتلهم
وجل حبي المقدس لا كتلهم
كالو حيل دنك لا كتلهم
عنايه احتاج كلبه وجاي اعاني
وخفيت شكثر منك جاي اعاني
تمرمرني من ازورك جايع اني
شكثر ندمان جي بيتك عتبته
وعرفي الباب من دكتي وعتبته
عتابي وياك جي احبك عتبته
كلبي شلون يمهم وك كسرته
اسير وذل شجالك وك اسرته
كبل جانت اسرتك ولك اسرته
هسه اسرتك سمتني الضحيه
وشكرا

من طرف **معاد الجبوري** 12/11/2007, 5:38 pm

مشكورررر على الموضوع

كلش حلوة

قصيدة الحب الاول(ابو ذيه)زنجيل

قصيدة الحب الاول(ابو ذيه)زنجيل

رد: قصيدة الحب الاول(ابو ذيه)زنجيل