اماني الطفوله ؟؟؟ رساله الى جميع الساسه العراقيين

(( أماني الطفوله!!!!))


حينما تكون الامنيه شيئا في زواغير الظلام_ _ _ _ _ !!!




عربانة دفع سترت بيوت هواي


وعوائل من عوائل عايشه عليهه


جم طفل بطفل عاشت عمر وياه


وصارت مثل عرضه بروحه يفديهه


طب للسوك باجر تلكه عدنه ورود


جف العوز كسر كل امانيهه


بذرتهم قهر ونزرعت بالآم


وحاصوده الوكت كل يوم تحويهه


واحدهم تشوفه زغير من بعيد


بس بدموعه تلكه الدنيه باجيهه


تلكاه مو طفل بالهم جزه التسعين


البراءه اتحولت وحشيه تاليهه


للااطفال عيد وتفرح الاطفال


والفرحه اعتقد معروف راعيهه


مو مثل اليدور كروه للاايجار


هذا الماتمره ومايمر بيهه


بس عاشور عيده يصير تدري شلون


اذا ضاع الشغل يكعد يحاجيهه


فدوه لخاطر امي امبارك المسواك


وعندي اخواني جاعت ورد اعشيهه


ويفتر بالولايه ويجي لهذا وذاك


عمي ايجار عايز ورد اوديهه

ويجي البيته جسد والروح صح وياه


يجر بالروح كوه تكول سابيهه


لان امه خطيه متانيه اعله الباب


ومن امه استحه بياهم يلااكيهه


الله_مو طفل شايل صبر ايوب


هموم الدنيه كلهه براسه خافيهه


ويجي الماعنده غيره يعامله بتحقير


والكروه البسيطه ابذله ينطيهه


يوصله الباب بيته ونزل المسواك


ويكله ارد اروح الكروه تنطيهه؟


يكله الكروه ماكو شلون انه انطيك


نص السلعه بيدك جنت جافيهه


الى هل الحد وصل عدنه الظلم والجور


مقابل ماندعمه انحاربه عليهه


الوكت ضده وكف واحنه وجميع الناس


هاي الناس مدري شلون اسميهه


رساله لكل وزير لكل شخص مسول


وكل احزابنه لازم نوعيهه


رساله لكل سياسي امجلس النواب


رساله من الطفل بالدم نوديهه


مو انه الكلت كل طفل هيج يكول


ونه السان الشعب وحجايته احجيهه


العربانه الدفع ندفعهه من العوز


وتنطينه بكثر مااحنه ننطيهه


ودفعناكم امس بصواتنه بلا خوف


ونفسهه الدفعتك بترت رجليهه


بيوت الشبعتك من مر عليك العوز


ذره من الطحين اليوم مابيهه


احذرك ونتبه للشعب لايغتاض


ويكلب من يضوج اسفلهه عاليهه


لتكلي انتظر شنتظر منك خير


معاناة الطفوله اشوكت تلغيهه


ابفضل اصواتهم هسه انتم تحكمون


وهسه اصواتكم زادت بواجيهه



ذوله اطفال لازم بس فرح يلكون


ودموع البواجي الكم نخليهه


لان ذوله عطاشه ولازم انه وياك


نلم دموعنه ودمعات نرويهه


ولازم بالوجوب ومو بالاستحباب


العربانه الدفع مدرسه انسميهه


لان سترت اجيال وعلمت اجيال


وظيم الدنيه كله وداعتك بيهه


اذا مرت علينه اعتقد واجب صار


بالاستعداد نوكف من نحييهه _ _ _ _ بالاستعداد نوكف من نحييهه


(((((((((((((((((((((((((((((((((((((((((((((((((( (((((((((((((((((((((((((((((((((((((((((((((((((( ((((((((((((((
ملاحظه:

قال الكثير من النقاد والشعراء عندما سالتهم عن فكرة موضوع( العربانه) فاعتبر اكثرهم ان الموضوع مجازفه بحجة لم يكتب اي شاعر قط عن هذا الموضوع 0فجعلت العراق بين اعيني ودموع ومعاناة الاطفال امامي وكتبت الموضوع الذي استغرق بقرابت 3 اشهر لانه موضوع حساس وبعد اكتمال القصيده وقد قراتها في مهرجان في البصره وامسيه في الزبير ومهرجان في كربلاء ومهرجان في بغداد قد جات التهاني والتبريكات من الذين عارضوني بالكتابه 00واقول ان سبب نجاحي هو دعمكم لي