قصيده عن العراق الحبيب

جبيرة السالفة ببغداد
خلكك لازم تفضه
اظل جم دوب اغض الطرف هنه هواي
ملموم الطرف من كثر ما اغضه
ومديت الحبل كله على طوله وياك
رد مكطوع ثاري الفار جان بعبك يكرضه
مثل الذيب لمن شاف لية الشاة
تصفن كام يتوضه
اجاكم للحلك مجحوف ومثل
جهمة بغل بشعير دنك نابك يعضه
شيصير الوطن كلي بعد شيصير
فخختوه وفجرتوا مثل عبوة حقدكم طار وتشظه
اجينا نلملمك تاره جسد مجروح
يصيح احا بويه مين ما اكضه
احتلال وطائفية احزاب تيارات
كلها بساحة المذبوح مكتضها
ديمقراطية كل الناس امان وخير
بس احنا احتلال وطائفية ومهزلة وفوضى
عساها ببخت كل من ساس بيها
ودمر شعب العراق ودنسوا ارضه
شيصبر الروح لمن تشوف
جيش الغاصب المحتل يمشي بطوله وبعرضه
لا صارت ولا تصير بالقرن الواحد وعشرين
يحتل العراق وينتهك عرضه
واحنا الكاع منا تخاف
اذا ندبج عليها وثوبنا ننفضه
جم واحد بواحد عال بينا وخاب
ورد لامه ذليل مفين بحظه
واحنا بس الهوا نسمحله يمر خشم العراقيين
واذا بي ريح صفرة نسده ونرفضه
كلي شورطك بينا يا راعي الهوش
غير الندم عض ابهام ما تحضى
جاي انته على اهل الراي
رايد رايك تفرضه
ولك واحنا العراقيين من نغتاظ
على امنا وابونا تمر ساعات ما نرضى