مر يا وطن ....جميله في حب العراق

للعراق والشعب العراقي الصابر
***********************
مر يا وطن
أعبر علي لا تعتذر أعبر أنه ابدربك جسر
أعبر علي ولا تظن ياذيني مشيك من تمر
دوس أعلى ضلعي وفدوه لك منذور أنه لعمرك نذر
. ***
خل جرحي ينزف كل وكت لاجلك أموت وانتحر
انته الهوى وانته الضوى وانته القصايد والشعر
المن بعد لو ما الك شمعه آنه اضوي وأنصهر
مر يا وطن.. ذيچ الشمس مر يا وطن.. لا تنتظر
. ***
يا جرحي الحدر الضلع يا كسري الما ينجبر
يل تطعن اچفوف الحقد گلبك خناجرها بغدر
شعلوك نيران وحطب زادوا عليها أهل الكفر
ودهم يحرگون الزرع والصافي يتبدل عكر
ذبحوا فرحتك يا وطن وارتجفوا أطفالك ذعر
وشما يطولون الظلم لازم يشع نور الفجر
ما ينكسف وجه الشمس بغيوم سود ولا صفر
. ***
انته اكتبت قصة الزمن وانته انولد بيك الفكر
يا سومر و بابل وأكد وآشور واوروك وحضر
يا أول اكتاب ونشر يا أول احروف وحبر
يردوني أعوفن عشرتك وأحباب چنا امن الزغر
واشلون أعيش ابلا عشك وانكر صحبتك واستقر
وآنه اشربت مايك شهد واتنسمت ريحك عطر
وابحضن أمي امن المهد حبك رضعته امن الصدر
. ***
مر يا وطن… رغم المحن و وياك أبدي امن الصفر
هاذ آنه بدروبك گلب وانبض الك طول العمر
فزعني واتحزم فشك ما هاب أنه ولا أعتذر
اوگف لك ابوجه العدى واعبر لك الدرب الخطر
وارفع بيارغ للسما اترف ابفخر بيض وخضر
بيها العمايم والعگل سود و تشع مثل البدر
أهل المضايف والكرم والزود وزنود السمر
أهل المگاوير البقت هوسات عز وتنذكر
بالله ومحمد وبعلي او ولده الميامين الزهر
تبقى المآذن والكنا- ئس تصدح ابصبح وعصر
واطفالنا اتعود ابفرح بين المدارس تبتشر
. ***
بسم الله اعيذك يا وطن واعلك لك اشموع الخضر
تمضي الشدايد والمحن ويظل الك تاج الفخر
واعداك مهما طاولوا أهل الدسايس والغدر
نهزمهم ابصاية علي انشوفهم انجوم الظهر
رادوا يمكرون و نسوا ربك اله الكر والمكر
مهيوب دومك يا وطن مهيوب يا عز ونصر

الف الف شكر والله مواضيعك جدا رائعة

مشكوررررررررررررررررر